[الفصل الأول]

(المشهد الثاني)

 

المكان:-فيلا مراد

الديكور:- نفس الديكور بالإضافة إلى سرير صغير بجوار الكمبيوتر

الزمان: قبل التجربة بساعة وربع

((مراد يطمئن باهتمام شديد على الجهاز وسرعته وكفائته ايضا))

 

مراد: أهو كده أنا اطمنت على الوضع النهائي على الله يوصلوا كلهم في وقت واحد علشان نبتدي التجربة بسرعة….((ينادي جودة))….يا جودة…..يا جودة انت يا بني آدم.

 

جودة: ((يدخل مهرولا)) أيوة يا بيه.

 

مراد: النهاردة عندي تجربة خطيرة وعايزك تفنجل عينيك كويس النهاردة….مفيش تليفونات يترد عليها….محدش يعرف إني موجود في البيت….وكمان تشقر عليا كل شوية علشان أنا تقريبا هابقى كأني نايم بس أنا أكيد مش نايم أنا مع الجروب بتاعي في الشات.

 

جودة: أوامرك يا داكتور….. بس أني مش فاهم حاجة.

 

مراد: مش مهم تفهم يا جودة المهم تنفذ التعليمات وخلاص.

 

جودة: حاضر يا بيه.  

 

((يعود مراد ليتأكد من وصلات الجهاز فترة قصيرة من الزمن ثم يتنفس الصعداء وينظر إلى جودة في حنان غريب ثم يتحدث إليه بابتسامة مشجعة))

 

مراد: عارف يا جودة ……. كان نفسي تبقى معايا النهاردة في التجربة دي، أصلي مبقدرش استغنى عنك.

 

جودة: أني …. أني مبتقدرش تستغنى عني.

 

مراد: طبعا….محدش في الدنيا يعرف أنا بحبك قد ايه.

 

جودة: ((بلهجة عدم التصديق)) طيب يا بيه.

 

مراد: أنا فاهم إنت بتفكر في إيه…((يعود إلى الجهاز)) منين الدكتور مراد بيهزأني وبيبهدلني وبيمرمط بيا البلاط….((يعتدل من وراء الجهاز ناظرا إلى جودة)) ومنين برضه بيحبني….مش ده اللي بتفكر فيه يا جودة.

 

جودة: صح …. إيوة …. هوا ده اللي كنت بافكر فيه بالضبط يا داكتور.

 

(( مراد يترك الجهاز ويتجه نحو جودة في خطوات منتظمة وطويلة حتى يقترب منه))

 

مراد: عارف أنا ليه بهزأك يا جودة؟

 

جودة: علشان فاكرني غبي…مش كده؟

 

مراد: لأ مش كده ….. إنت أذكى واحد أنا قابلته في حياتي.

 

جودة: بقى اني أذكى واحد قابلته في حياتك يا داكتور؟

مراد: أيوة.

 

جودة: من بين كل اللي انت شفتهم.

 

مراد: إنت مستغرب ليه؟

 

جودة: لأني عارف انت بتقعد مع مين …. كلهم ناس كبارات وبيتكلموا في حاجات صعبة قوي أني مبفهمهاش بعدين تقلي انت اذكى منهم.

 

مراد: وانت فاكر الذكاء بإيه يا جودة ….. الذكاء يا حبيبي لا بالكلام ولا بالحواديت ….. كل اللي انت بتشوفهم دول يا جودة بيتكلموا في الحاجات الكبيرة مجرد ناقلين …. ناس قرت الكلام وحطته في دماغها وماشية تتمنظر بيه على خلق الله…. بعدين هنبعد بعيد ليه….أهو عندك السياسة مثلا…..بقالي خمسة وعشرين سنة باتابع سياسة….في التليفزيون وعلى الدش وحتى في الإذاعات….. نفس الناس ونفس الكلام ونفس الأفكار ولا هما اتغيروا ولا غيروا ولا عارفين يغيروا حاجة.    

 

جودة: أمال هما ليه بيتكلموا فيها ما دام مش قادرين يغيروا حاجة يا داكتور.

 

مراد: تقدر تقول يا ابني فراغ …. الواحد فيهم بدال ما يقعد على القهوة يطلع في التليفزيون يتكلم كلمتين ويقبض المعلوم ويسرح على بيتهم …. أو يعمله حزب بدل الفراغ اللي هوا فيه بعد ما طلع على المعاش…ومفيش مانع لو صحفي وليه اسمه يفتحله جرنان يشتم في الحكومة واللي جاب الحكومة ده غير اللي ماشيين مع الحكومة نفسهم وبيروجوا لسياستها بس دول بقى ملهمش رأي أساسا دول بس بيعيدوا الكلام اللي بيسمعوه علشان بس ينشروه للناس او يعملوله دعاية واللي ما يشتري يتفرج.

 

جودة: إهيه….طيب اني ذكي وبافهم يا داكتور…. ليه بتهزأني بقى؟

 

مراد: علشان غيران منك.   

 

جودة: غيران مني اني إزاي يا داكتور؟

 

مراد: حظك بقى يا جودة…..وبعدين محدش يهزأ او يقلل من قيمة واحد مبيغرش منه…..وبعدين انت عقدتي في الحياة…….إنت الوحيد اللي عقدني في حياتي يا جودة.

 

جودة: أني؟؟!!!…………إزاي يا بيه؟

 

مراد: عارف يا جودة……كل اللي انت شايفهم حواليا دول بيغيروا مني…..إنت نفسك بتغير مني…..أنا عارف……باشوفك وانت واقف كل يوم الصبح قدام صورتي تهاجمها وتشتم فيها…..قصدك تشتمني طبعا…..ومتسألنيش باشوفك ازاي……دي عادة قديمة يا جودة فيا……عادة المراقبة ومش ناوي أبطلها.

 

جودة: ((في تأهب وانتظار)) وبعدين يا بيه؟

 

مراد: وبعدين انت زي بقية الناس عايزين تبقوا أحسن مني في أي حاجة وتهزموني في أي ميدان يعجبكوا زي أي ميدان أنا فيه الفارس الأول……أصلك يا ابني متعرفش البهوات اللي حبوا ينافسوني…..فيه اللي حب يعرف ستات أكتر مني وأحلى من اللي أنا أعرفهم…….وفيه اللي حب يبقى أغنى مني وعنده فلوس أكتر من اللي عندي……وفيه اللي كان عايز يبقى أشطرمني في الدراسة وبعديها الدرجات العلمية وبعديها الإختراعات العلمية اللي بدأت أنفذها من عشر سنين بنجاحات متواصلة ومتلاحقة…..إنما انت بقى يا جودة نافستني في حاجات تانية…….حاجات أنا متأكد انك فيها أحسن مني وبكتير.

 

جودة: حاجات إيه دي يا داكتور؟

 

مراد: حاجات زي الإيمان….العبادة…..إهتمامك بالصلاة والزكاة والصوم…….تعرف إني في حياتي مصمتش غير رمضان واحد زمان…..وأهم حاجة كمان اني متأكد إنك الوحيد اللي لو وقعت في مشكلة يستحيل تسيبني فيها أغرق وهتمدلي إيدك……صحيح إنت مبتحبنيش…..بس يستحيل تأذيني على عكس ناس كتير قوي يتمنولي الأذية ومن ضمنهم فتحي اللي بييجي هنا يلحس التراب علشان يقعد معايا.

 

جودة: ((في تأثر شديد)) ياااااه يا داكتور…..مكنتش أعرف إن فكرتك عني كويسة كده.

 

مراد: ما قلتلك يا ابني……ما يهزقك إلا اللي غيران منك.

 

جودة: يعني إنت غيران مني بصحيح؟؟

 

مراد: والله العظيم أيوة……أنا عارف إني أنا وانت لو متنا دلوقتي إنت هتخش الجنة وأنا هاخش النار…….وهتعمل كل الحرام اللي أنا باعمله ده في الجنة عادي جدا انما انا هاتحاسب على الحرام ده لأني عملته عن غير طاعة ربنا وأوامره.

 

جودة: طيب لما انت عارف الكلام ده بتعمل الحرام ليه؟

 

مراد: كلنا بنحب الحرام يا جودة…..حتى انت بتحب الحرام.

 

جودة: أني؟؟؟؟

 

مراد: أمال ايه…..مش بتقعد قدام صورتي تسألها برضه ((مقلدا جودة)) مش عارف النساوين بتحب فيك ايه؟   

 

جودة: الشهادة لله يا بيه……أنا عمري ما اكدب……أيوة أنا باقول كده.

 

مراد: منا عارف يا ابني……مش بقلك مراقبك يا حبيبي……المهم بتحب الحرام ولا لأ؟

 

جودة: أنا أكيد نفسي أعمل الحرام طبعا يا داكتور….إنما……

 

مراد: إنما انت قوي…..إرادتك عالية……مش بالساهل تقع في الغلط…..لأنك خايف من ربنا دي حاجة ولأنك نضيف من جوه دي حاجة تانية.

 

 جودة: يا بيه أني أول هام عمري ما اطيق الحرام وان كنت بقول كده قدام صورتك فانا بقولها من غيظي يعني مش أكتر…..بعدين يا بيه برضك أني حتى لو جاتلي الفرصة وقدرت اعمل الحرام زيك كده….اني مش هوافق.

 

مراد: منا عارف…….علشان عندك إرادة.

 

جودة: لأ يا بيه مش علشان عندي إرادة…….علشان معنديش حاجة أصلا.

 

مراد: إزاي يعني؟

 

جودة: زي الناس يا بيه….زي معظم الناس الفقرا اللي طلعوا ملقوش غير ربنا بيقلهم إنتوا ليا وملكوش غيري وهتاخدوا حقكم مهما كان……بس استحملوا شوية ومتغركوش الدنيا……استحملوا يا حبايبي وانا أوعدكم بكل المتع اللي اتحرمتم منها…..استحملوا وانا اديكوا أكل وشرب وحورعين وبساتين وحاجات كتيرة قوي……استحملوا بس آمنوا بيه واعبدوني.

 

مراد: ياااااااااااه…..يعني انت بتعمل ده كله علشان ده بس يا جودة……علشان تاخد ده كله في الجنة يا ابني.

 

جودة: يعني أعيش محروم دنيا وآخرة يا داكتور….وبعدين لعلمك فيه ناس كتير أغنيا وبيعبدوا ربنا برضه……وناس كتير معاهم شهادات وبيعبدوا ربنا برضه…….بس انت مش شايف غيري.

 

مراد: جايز…..عموما حتى لو كلامك ده صح……..أنا ما قابلتش حد في إرادتك وإخلاصك وقوتك وأنا ثقتي فيك ملهاش حدود….((ينظر إلى ساعته))….شوفت أخرة الكلام معاك…..فاضل خمس دقايق على التجربة……ولازم استعد.

 

جودة: بالتوفيق يا داكتور.

 

مراد: جودة.

 

جودة: نعم يا داكتور.

 

مراد: هتوحشني قوي النهارده.

 

جودة: ((بابتسامة خجلى)) وانت كمان يا داكتور.

 

((يغادر جودة المسرح في خطاه المتثاقلة))

 

مراد: ابن حلال قوي…..ابن حلال بشكل ينرفز وانا بحبه قوي وباغير منه برضه رغم ان معندوش ربع اللي عندي أنا…..((ينظر إلى ساعته مرة أخرى)) يلا بقى يا مراد انسى جودة دلوقتي وخليك في التجربة((يتجه إلى السرير ويضع أقطابا لاصقة على رأسه موصولة بالجهاز))….واضح انهم كلهم على الجهاز دلوقتي…..بس مين اللي هيوصل في الأول دي مش معروفة……يلا بسم الله الرحمن الرحيم.

((يضغط مراد على زر في جهازه ثم يذهب في نوم عميق على السرير الذي يستلقي عليه))

 

[ستار]

 

ـــــــــــــــــــــــــــــــــــــــــــــــــــــــــ
التصنيفات : مسرحية حياة أون لاين بقلم أحمد فرحات | السمات:مسرحية حياة أون لاين بقلم أحمد فرحات
أرسل الإدراج  |   دوّن الإدراج